യാഹൂ! ഇന്ത്യയ്‌ക്കെതിരെയുള്ള പകര്‍പ്പവകാശ ലംഘന ആരോപണം

My protest against the attitude of Yahoo! India towards the allegations of copyright violation against them.

I strongly protest against the attitude of Yahoo! India towards the allegations of copyright violations against them. When various blog posts prepared by other bloggers were appeared in Yahoo! India’s Malayalam portal (for example, from Su's Kariveppila blog), instead of giving a proper explanation or accepting their mistake and acting accordingly, they silently removed the alleged contents from their web pages. On repeated enquiry, they, thought to be a professional organization, washed their hands off and asked the concerned parties to contact Yahoo’s content providers in India even though the said blog posts were appeared in the web pages owned by Yahoo! India. Those web pages are protected under copyright law by Yahoo!, not by their content providers. It is not the responsibility of the concerned bloggers to know the various contract details of Yahoo! India.

Therefore I demand that Yahoo! India should come forward and address the grievances of the concerned bloggers.

പകര്‍പ്പവകാശലംഘനങ്ങളൊന്നും നടത്താത്ത ഒരു പരമസാധുവൊന്നുമല്ല ഞാന്‍. ഡോളറുകള്‍ വിലയുള്ള പുസ്തകങ്ങളുടെ ആദ്യത്തെ പേജ് തൊട്ട് അവസാനത്തെ പേജ് വരെ ബുക്കിന്റെ രൂപത്തില്‍ തന്നെ ഫോട്ടോകോപ്പിയെടുത്ത് ബൈന്‍ഡ് ചെയ്ത് വെച്ചും ഏത് പുതിയ പാട്ടിറങ്ങിയാലും അത് കാലിക്കാസറ്റില്‍ റിക്കോഡ് ചെയ്യിച്ചും വ്യാജ വീഡിയോ കാസറ്റുകളില്‍ സിനിമ കണ്ടും സോഫ്റ്റ്‌വെയര്‍ കാശുകൊടുക്കാതെ ഒപ്പിച്ചുമൊക്കെ ധാരാളം പകര്‍പ്പവകാശലംഘനങ്ങള്‍ ഞാന്‍ നടത്തിയിരുന്നു. സത്യം പറഞ്ഞാല്‍ പകര്‍പ്പവകാശങ്ങളെപ്പറ്റി അത്രയൊന്നും ബോധവാനല്ലായിരുന്നു ഞാന്‍. പലരും ചെയ്യുന്നു, ഞാനും ചെയ്യുന്നു എന്നൊരു രീതിയായിരുന്നു.

നിങ്ങളില്‍ പാപം ചെയ്യാത്തവരുണ്ടെങ്കില്‍ എന്നെ കല്ലെറിയൂ എന്നാണ് യേശുക്രിസ്തുവും പറഞ്ഞിരിക്കുന്നത് എന്നാണ് വായിച്ചിരിക്കുന്നത്.

പക്ഷേ...

പകര്‍പ്പവകാശലംഘനം നടത്തരുത് എന്ന് എഴുതിവെച്ചിരിക്കുന്ന പോര്‍ട്ടലില്‍ പകര്‍പ്പവകാശലംഘനം ആരോപിക്കപ്പെടുമ്പോള്‍ ഒന്നുകില്‍ ലംഘനം നടന്നിട്ടില്ല എന്ന് സ്ഥാപിക്കുക, അല്ലെങ്കില്‍ നടന്നു എന്ന് സമ്മതിക്കുക-ഈ രണ്ടിലേതെങ്കിലുമൊന്നാണ് യാഹൂ! ഇന്ത്യ പോലത്തെ, പ്രൊഫഷണല്‍ എന്ന് ഞാന്‍ ഇത്രയും നാള്‍ കരുതിയിരുന്ന, പോര്‍ട്ടലുകളില്‍ നിന്നും പ്രതീക്ഷിച്ചത്. ഇനി ആരെങ്കിലും വെറുതെ ശല്യപ്പെടുത്താനോ മറ്റോ യാതൊരു അടിസ്ഥാനവുമില്ലാത്ത ആരോപണമാണ് ഉന്നയിക്കുന്നതെങ്കില്‍ അങ്ങിനെയുള്ളവര്‍ക്കെതിരെ വേണ്ട നടപടികളെടുക്കുക-ഇതും പ്രതീക്ഷിക്കാം.

പക്ഷേ ഇവിടെ ആരോപണം ഉന്നയിക്കപ്പെട്ടപ്പോള്‍ യാഹൂ!ഇന്ത്യ

1. ആദ്യം ആരോപണമുന്നയിക്കപ്പെട്ട പോസ്റ്റുകള്‍ എടുത്തുമാറ്റി.

2. പിന്നെയും ആരോപണങ്ങള്‍ തുടര്‍ന്നപ്പോള്‍ ഉത്തരവാദിത്തം മറ്റുള്ളവരുടെ തലയില്‍ കെട്ടിവെക്കാന്‍ നോക്കി.

3. എന്തോ ഔദാര്യം ചെയ്യുന്ന മട്ടില്‍ “പകര്‍പ്പവകാശ ലംഘനമൊന്നും നടന്നിട്ടില്ല, എന്നാലും ഞങ്ങള്‍ ആരോപണവിധേയമായ പോസ്റ്റുകള്‍ മാറ്റുന്നു” എന്നൊരു മറുപടിയും നല്‍കി.

ഞാന്‍ മനസ്സിലാക്കിയ പ്രൊഫഷണലിസം ഇതൊന്നുമല്ലായിരുന്നു. ഒരു സര്‍ക്കാര്‍ ഓഫീസില്‍ നടക്കുന്നതുപോലെ അമേരിക്കയിലെ യാഹൂ!വിനോട് ചോദിച്ചപ്പോള്‍ ഇന്ത്യയിലെ യാഹൂ!വില്‍ ചോദിക്കുക, അവിടെ ചോദിച്ചപ്പോള്‍ ഞങ്ങള്‍ കോണ്ട്രാക്റ്റ് കൊടുത്തവരോട് ചോദിക്കുക എന്നൊക്കെ പറഞ്ഞ് victims നെ പിന്നെയും പിന്നെയും victimize ചെയ്യുകയും ചെയ്തു.

ഇങ്ങിനത്തെ പരിപാടികളൊക്കെ കാണുമ്പോഴാണ് ഇംഗ്ലീഷ് സിനിമയിലൊക്കെ പ്രയോഗിക്കുന്ന വാക്ക് ഓര്‍മ്മ വരുന്നത്;

“അണ്‍‌ബിലീവബിള്‍”

പകര്‍പ്പവകാശം ഞങ്ങളില്‍ മാത്രം നിക്ഷിപ്തം എന്ന് എഴുതപ്പെട്ട പേജില്‍ പകര്‍പ്പവകാശ ലംഘനം ആരോപിക്കപ്പെട്ടപ്പോള്‍ അതിനെപ്പറ്റിയുള്ള സംസാരങ്ങളൊക്കെ ഞങ്ങള്‍ കോണ്‍‌ട്രാക്ട് കൊടുത്തവരുമായി ആയിക്കോ എന്നുള്ള വാദം വിശ്വസിക്കാനേ പറ്റുന്നില്ല. ഞങ്ങളുടെ നാട്ടില്‍ യാഹൂ!വിലെ വലിയ ആള്‍ക്കാരുടെ പതിനായിരത്തിലൊന്ന് പോലും വിദ്യാഭ്യാസമില്ലാത്ത സ്കൂളില്‍ പോലും പോയിട്ടില്ലാത്ത, വലിയ വലിയ സ്ഥലങ്ങളിലൊക്കെ കാണുന്ന തരത്തിലുള്ള “സംസ്കാരമോ” രീതിയോ ഒന്നും വശമില്ലാത്ത സാധാരണക്കാരില്‍ സാധാരണക്കാരായ ആള്‍ക്കാര്‍ പോലും ഇത്തരമൊരു ഒഴിവുകഴിവ് ഒരിക്കലും പറയുമെന്ന് തോന്നുന്നില്ല.

അവരൊക്കെ യാഹൂ!വിലും എത്രയോ ഉയരത്തിലാണ്, എല്ലാ അര്‍ത്ഥത്തിലും.

ഇവിടെ ഞാനെന്തിന് പ്രതിഷേധിക്കുന്നു?

സര്‍ക്കാരാണെങ്കിലും ജനങ്ങളാണെങ്കിലും അവരവരുടെ കടമ നിര്‍വ്വഹിക്കണം എന്നൊക്കെ വലിയ വായില്‍ വിളിച്ചുപറയുന്ന, നമ്മള്‍ ചെയ്യേണ്ടതൊക്കെ നമ്മള്‍ ചെയ്യണം, അല്ലാതെ അതിന് മറ്റുള്ളവരെ പഴി പറഞ്ഞിട്ട് കാര്യമില്ല എന്നൊക്കെ പറയുന്ന ഞാന്‍, വല്ലപ്പോഴെങ്കിലും പറയുന്ന വാക്കിന് വില കാണിക്കേണ്ടേ? മറ്റു പലപ്പോഴുമെന്നപോലെ വാക്കൊരു വഴിക്കും പ്രവര്‍ത്തി വേറൊരു വഴിക്കും എന്ന ലൈന്‍ ഇവിടെയുമായാല്‍ മനഃസാക്ഷി എന്നൊരു സാധനം എനിക്കുണ്ടോ എന്നുപോലും തോന്നിപ്പോവില്ലേ.

പ്രതികരിക്കാനും ശക്തമായ സന്ദേശം നല്‍കാനും ധാരാളം വഴികളും സമയവും കാര്യങ്ങളും ഉണ്ടായിട്ടും ആ സമയത്തൊക്കെ ചെയ്യേണ്ട കാര്യങ്ങള്‍ ചെയ്യേണ്ട രീതിയില്‍ ചെയ്തോ എന്നുള്ള ചോദ്യങ്ങളൊക്കെ സദ്ദാം വധത്തിനോടനുബന്ധിച്ചുള്ള പ്രതികരണങ്ങളെപ്പറ്റിയുള്ള ചര്‍ച്ചകളിലും മറ്റും ചോദിച്ച ഞാന്‍ ഇപ്പോള്‍ അങ്ങിനെയുള്ള ഒരു അവസരം വന്നപ്പോള്‍ പ്രതികരിക്കാതെ, ഒന്നും സംഭവിച്ചിട്ടില്ല എന്ന മട്ടിലിരുന്നാല്‍ എന്റെ വാക്കുകളോട് എനിക്ക് തന്നെ ഒരു പുച്ഛം തോന്നില്ലേ (സദ്ദാം വധവും പകര്‍പ്പവകാശലംഘനവും ഒരേ പോലെ കാണുകയല്ല, പ്രതികരണങ്ങള്‍ എപ്പോള്‍ എങ്ങിനെ എന്നൊക്കെയുള്ള എന്റെ വാദങ്ങളെ താരതമ്യപ്പെടുത്തി എന്ന് മാത്രം).

പിന്നെ ബ്ലോഗ് വഴി അറിഞ്ഞ ഒരു നല്ല കവിതയും.

When the Nazis came for the communists,
I remained silent;
I was not a communist.

When they locked up the social democrats,
I remained silent;
I was not a social democrat.

When they came for the trade unionists,
I did not speak out;
I was not a trade unionist.

When they came for me,
there was no one left to speak out.

(കവിത വിക്കിപ്പീഡിയയില്‍ നിന്നും കോപ്പി ചെയ്തത്).
(The above poem is taken from an article, which is licensed under the GNU Free Documentation License. It uses material from the Wikipedia article "First they came...").

(പകര്‍പ്പവകാശപാലനം അത്ര ഈസിയായ സംഗതിയല്ലാ...)

എനിക്ക് പ്രതികരിക്കാന്‍ അവകാശമുണ്ടോ?

മുകളില്‍ പറഞ്ഞതുപോലെ പകര്‍പ്പവകാശലംഘനമുള്‍പ്പടെ ധാ‍രാളം തെറ്റുകള്‍ ഇപ്പോഴും ചെയ്തുകൊണ്ടിരിക്കുന്ന ഒരാള്‍ തന്നെ ഞാന്‍. പക്ഷേ അത് ഒരിക്കലും അത്തരത്തിലുള്ള തെറ്റുകള്‍ ചെയ്യാന്‍ മറ്റുള്ളവര്‍ക്ക് ഒരു ന്യായമാകുന്നില്ലല്ലോ. പാപം ചെയ്യാത്തവര്‍ മാത്രം കല്ലെറിഞ്ഞാല്‍ മതി എന്ന് ഇപ്പോള്‍ ഏറ്റവും കൂടുതല്‍ ആഗ്രഹിക്കുന്നത് തെറ്റുകള്‍ ചെയ്യുന്നവര്‍ തന്നെയായിരിക്കും.

തെറ്റ് എന്നോടാണ് ചെയ്തതെങ്കില്‍ തെറ്റ് ചെയ്ത ആളോട് നിരുപാധികം ക്ഷമിക്കാനുള്ള എല്ലാ ധാര്‍മ്മിക ബാധ്യതയും എനിക്കുണ്ട്. കാരണം ധാരാളം പേര്‍ എന്നോട് പല തെറ്റുകള്‍ക്കും ക്ഷമിച്ചിട്ടുണ്ട്. പക്ഷേ വേറൊരാള്‍‍ തെറ്റ് തന്നോട് ചെയ്യപ്പെട്ടു എന്ന് കരുതുകയും എന്റെ നോട്ടത്തില്‍ അത് ശരിയാണെന്ന് മനസ്സിലാവുകയും ഞാന്‍ അയാളോടൊപ്പം നിന്ന് പ്രതിഷേധിക്കുന്നതില്‍ അയാള്‍ക്ക് വിരോധമൊന്നുമില്ലാതിരിക്കുകയും എന്നെപ്പോലുള്ളവരുടെ പ്രതിഷേധങ്ങള്‍ അയാള്‍ക്ക് ഇത്തരുണത്തില്‍ കുറച്ചെങ്കിലും ആശ്വാസം കിട്ടും എന്ന് എനിക്ക് തോന്നുകയും ചെയ്യുന്ന അവസ്ഥയില്‍ അങ്ങിനെയുള്ളയാളെ ഉപാധികളൊന്നും കൂടാതെ സഹായിക്കുക എന്നതും എന്റെ ധര്‍മ്മം തന്നെ എന്ന് ഞാന്‍ വിശ്വസിക്കുന്നു. അതുകൊണ്ട് തന്നെയാണ് ഈ പ്രതിഷേധത്തില്‍ ഞാനും പങ്ക് ചേരുന്നത്.

ഇവിടെ എന്റെ സാന്നിധ്യം എന്റെ മനഃസാക്ഷിക്കനുസരിച്ച് മാത്രം. ഇതില്‍ ഉള്‍പ്പെട്ടവരുടെയും പങ്കെടുക്കുന്നവരുടെയും മറ്റും പെരുമാറ്റമോ രീതിയോ സ്വഭാവമോ ഒന്നും ഞാന്‍ നോക്കേണ്ടതില്ല എന്ന് തോന്നുന്നു. സംഭവിച്ചതെന്താണെന്ന് മനസ്സിലാക്കി ആ സംഭവത്തെ മാത്രം ഫോക്കസ് ചെയ്ത് മനഃസാക്ഷിക്കനുസരിച്ച് ഒരു തീരുമാനമെടുത്താല്‍ പിന്നെ ബാക്കി കാര്യങ്ങളൊന്നും അത്ര പ്രാധാന്യമുള്ളതായി നമുക്ക് തോന്നില്ല എന്നാണ് എന്റെ അഭിപ്രായം.

ഈ ഒരു പ്രതിഷേധം കൊണ്ട് ഏതെങ്കിലും വ്യക്തിയ്ക്ക് എന്തെങ്കിലും രീതിയിലുള്ള നഷ്ടമോ പ്രശ്‌നമോ, വ്യക്തിപരമായോ ഔദ്യോഗികപരമായോ, ഒരിക്കലും വരരുതേ എന്ന് മാത്രമാണ് എന്റെ പ്രാര്‍ത്ഥന. അങ്ങിനെ ഒരിക്കലും ഒരു രീതിയിലും സംഭവിക്കാതിരിക്കട്ടെ.

അതുകൊണ്ട് യാഹൂ! ഇന്ത്യയുടെ പകര്‍പ്പവകാശ ലംഘനത്തിനെതിരെയും പ്രസ്തുത ആരോപണത്തോടനുബന്ധിച്ചുള്ള അവരുടെ ഇതുവരെയുള്ള നിലപാടുകള്‍ക്കെതിരെയും ഞാന്‍ ശക്തിയായി പ്രതിഷേധിക്കുന്നു.

Some of the blog posts and websites for reference:

1. കടന്നല്‍കൂട്ടത്തില്‍ കല്ലെറിയരുതേ...

2. Protest event against yahoo-ഇഞ്ചിപ്പെണ്ണ്

3. Plagiarism Today

4. യാഹൂ! ഇന്ത്യയുടെ നിഷേധക്കുറിപ്പിനെപ്പറ്റിയുള്ള പരാമര്‍ശം

5. List of articles and protests in blogs

6. Copyright violations

For more information on the alleged plagiarism by Yahoo! India, both in Malayalam and English, follow the links given in blogs like this, this and this (examples only).